UET në Panairin e 32-të Ndërkombëtar të Tiranës/ Partneritete të reja me biznesin, diskutime mbi investimet dhe ruajtjen e traditës
Stenda e Universitetit Europian të Tiranës do të qëndrojë e hapur përgjatë katër ditëve në Pallatin e Kongreseve, në Panairin e 32-të Ndërkombëtar të Tiranës. I organizuar nga Klik Ekspo Group, panairi do të zhvillohet në datat 3-6 tetor, duke e kthyer kryeqytetin në pikën kryesore të takimit të sipërmarrjes shqiptare me partnerë të tjerë kombëtarë dhe ndërkombëtarë. Gjatë këtyre ditëve do të zhvillohen ekspozita, konferenca dhe do të ndahen përvoja të drejtpërdrejta nga pjesëmarrësit.
Për UET, ky panair është i rëndësishëm për të zgjeruar partneritetet e tij me industrinë vendase dhe të huaj, në kuadër të bashkëpunimeve që ka me bizneset dhe kontributit të vazhdueshëm që ato japin në përmirësimin e kurrikulave dhe përgatitjen e studentëve me aftësitë e reja që kërkon tregu i punës, si dhe për të shtuar mundësitë për praktika mësimore dhe punësim. Përveçse me stendën e tij, UET do të kontribuojë në këtë panair me pjesëmarrjen e drejtuesve dhe pedagogëve në disa panele dhe diskutime.
Ndërsa dita e parë e hapjes do të nisë me fjalët përshëndetëse të drejtuesve të institucioneve, agjencive qeveritare, organizatorëve, si dhe eksplorimit të stendave të të gjithë pjesëmarrësve, dita e dytë do të nisë me panelet e diskutimit.
Forumi i Biznesit dhe Industrisë sjell këndvështrimin e investitorëve në një dialog me drejtues të qeverisë dhe të biznesit. Ai do të shqyrtojë se si Shqipëria dhe Ballkani Perëndimor mund të tërheqin kapital afatgjatë, të zhvillojnë projekte të besueshme dhe të ndërtojnë partneritete produktive, duke u ofruar njëkohësisht investitorëve një pasqyrë më të qartë të mundësive që ka vendi ynë. Në diskutim do të marrin pjesë investitorë, pronarë biznesesh, drejtues korporatash, institucione financiare, zhvillues projektesh dhe politikëbërës në fushën ekonomike.
Pjesë e këtij paneli do të bëhet presidenti i Universitetit Europian të Tiranës, Prof. Asoc. Dr. Selami Xhepa, njëkohësisht Anëtar i Këshillit Mbikëqyrës të Bankës së Shqipërisë, i cili do të flasë për mundësitë dhe oportunitetet që ofron Shqipëria dhe Ballkani Perëndimor për investitorët e huaj, parë kjo nën prizmin e sigurisë, qëndrueshmërisë, politikave ndihmuese dhe burimeve njerëzore.
Forumi i radhës, më datë 4 nëntor, do t’i dedikohet mundësive që ofron Shqipëria në sektorin e energjisë, gjatë të cilit udhëheqësit e politikave dhe industrisë do të eksplorojnë se si furnizimi i besueshëm vendas dhe eksportet mund të zhvillohen së bashku, duke krijuar mundësi për investitorët e energjisë, operatorët dhe përdoruesit industrialë. Përveç përfaqësuesve të institucioneve dhe bizneseve në fushën e energjisë, pjesë e panelit do të bëhet edhe akademia, me të ftuar presidentin e Tirana College of Tirana, Dr. Gjergji Simaku – President i Kolegjit Teknologjik të Tiranës; Ekspert i Energjisë.
Forumi i radhës, i orës 16:00, ka në vëmendje traditën dhe vazhdimësinë kulturore. Kjo tryezë e rrumbullakët do të eksplorojë dizajnin si një mënyrë për të bartur njohuritë, vlerat dhe traditat në jetën bashkëkohore. Diskutimi do të përqendrohet në vazhdimësinë kulturore, duke mundësuar që praktikat e trashëguara të zhvillohen në përgjigje të nevojave të reja, duke ruajtur kuptimin dhe identitetin e tyre. Pjesë e diskutimit do të bëhen dizajnerë, arkitektë, institucione kulturore dhe akademike, autoritete publike, artizanë dhe biznese që punojnë me njohuritë dhe trashëgiminë lokale.
Nga Universiteti Europian i Tiranës do të marrin pjesë: Henri Çili- themelues i UET; Otjela Lubonja- drejtuese e Departamentit të Arkitekturës dhe Inxhinierisë së Ndërtimit; Geis Tafa – lektor në fushën e Dizajnit; Abaz Hado- lektor dhe piktor; Tidita Abdurramani- Drejtuese e Departamentit të Arteve të Aplikuara; Blegina Hasko Bezo- lektore në Departamentin e Arteve të Aplikuara; Joan Ikonomi- lektor në Departamentin e Arkitekturës dhe Inxhinierisë së Ndërtimit.
Themeluar në vitin 1994, Grupi Klik Ekspo organizon prej vitesh Panairin Ndërkombëtar të Tiranës, iduke shërbyer si një urë lidhëse e bizneseve shqiptare me ato ndërkombëtare sipas fushës së tyre të operimit. Përmes prezencës në stendë dhe kontributit në forumet e diskutimit, UET synon të zgjerojë hapësirat e bashkëpunimit mes akademisë dhe industrisë, të promovojë ekspertizën akademike dhe të krijojë mundësi të reja për studentët, në funksion të përgatitjes së tyre për sfidat dhe kërkesat e tregut bashkëkohor të punës.
