Inovacioni në agjendën e BE/ Mbi 41 kërkues shkencor të huaj, pjesë e Konferencës Ndërkombëtare në UET

UET zhvilloi për të dymbëdhjetin vit radhazi Konferencën Ndërkombëtare Ditët e Studimeve Shqiptare. Tematika ombrellë e këtij viti, “Nxitja e inovacionit në kornizën e agjendës së re konkurruese të BE-së”, mblodhi një numër të lartë punimesh shkencore me autorë shqiptarë, si dhe kërkues shkencorë të huaj nga rajoni dhe Europa. Dita e hapjes së konferencës, që si çdo vit zhvillohet në muajin prill, përkoi me përmbylljen e dy projekteve Jean Monnet të zbatuara në UET, nën financimin e Bashkimit Europian, me fokus shtimin e njohurive dhe ekspertizës për çështjet e unionit dhe integrimit.

Në hapjen e Konferencës Ndërkombëtare “Ditët e Studimeve Shqiptare” në UET morën pjesë drejtues të lartë të universitetit, si Presidenti Selami Xhepa dhe Rektorja Drita Kruja, përfaqësues të Delegacionit të BE-së në Shqipëri, si Herbert Perr, përfaqësues nga Kryeministria si Oriana Arapi, drejtuesja e agjencisë së SASPAC Eridana Çano, si dhe akademikë ndërkombëtarë si prof. Francesco Privitera nga Universiteti i Bolonjës. Të pranishëm ishin gjithashtu mbi 41 studiues të huaj nga SHBA, Mbretëria e Bashkuar, Italia, Portugalia, Holanda, Maqedonia e Veriut, Kosova dhe vende të tjera, së bashku me akademikë, studentë dhe përfaqësues të institucioneve publike dhe agjencive që lidhen me proceset e integrimit europian.

Presidenti i UET, prof. asoc. dr. Selami Xhepa tha se në një botë që ndryshon dita ditës ka shumë çështje interesante për të qenë objekt i kërkimit shkencor. “Por kishim shumë arsye të mira për të ftuar studiuesit të diskutonin çështjet e integrimit në BE dhe zhvillimet e pritura që do të kenë një fuqi transformuese për shoqërinë shqiptare, politikën dhe ekonominë e saj”, theksoi Xhepa.

Hapja zyrtarisht e dy grup-kapitujve I dhe III në fund të 2024-ës dhe përgatitja e hapjes së grup-kapitullit tjetër, ndërsa qeveria dhe kryeministri synojnë mbylljen e procesit pas dy viteve, sipas ekspertit të ekonomisë është një arsye e rëndësishme për të trajtuar ndryshimet dhe transformimet që do të pësojë shoqëria shqiptare, në ekonomi, industri, tregje apo sektorë të caktuar. E ndërsa Shqipëria përgatitet drejt këtij tranzicioni, bota ndërkombëtare është mes proceseve të reja ekonomike dhe politike, e kërcënuar nga lufta tarifore.

Një moment kyç për komunitetin akademik dhe shkencor, e cilësoi rektorja e Universitetit Europian të Tiranës, prof. dr. Drita Kruja. Sipas saj, tema e kërkimeve shkencore, përveçse pasqyron ndryshimet që ndodhin përreth, iu kujton universiteteve rolin që duhet të luajnë në formësimin e së ardhmes.

Gjithashtu u shpreh krenare, që mes më shumë se 200 autorëve, të cilët do të prezantojnë mbi 95 punime shkencore, 41 prej tyre vijnë nga Mbretëria e Bashkuar, Shtetet e Bashkuara, Portugalia, Holanda, Italia, Maqedonia e Veriut, Kosova dhe vende të tjera.