10 ish-studentë dhe ish-asistentë-lektorë të UET, pjesë e Shkollës së Magjistraturës

UET mblodhi në një bashkëbisedim ish-studentë dhe ish-asistentë- lektorë të këtij universiteti që janë bërë pjesë e Shkollës së Magjistraturës, institucionit më të lartë të formimit profesional në fushën e drejtësisë ku përgatiten gjyqtarët dhe prokurorët

Diskutimi mbi drejtësinë është një temë e ndjeshme në Shqipëri, për faktin se vendi ynë gjendet mes Reformës në Drejtësi dhe procesit të vettingut, si një kusht për integrimin europian. Sistemi i drejtësisë, ndoshta më problematiku, por jo i vetmi, ka nisur ‘pastrimin’ prej figurave të korruptuara të gjyqtarëve dhe prokurorëve. “Drejtësia është shpresa e fundit që shqiptarët kanë se vendi mund të bëhet dhe Shqipërisë mund t’i kthehet shpresa”, u shpreh presidenti i UET, Prof. Asoc. Dr. Selami Xhepa në një takim të organizuar në UET me 10 ish- studentë dhe ish- asistentë-lektorë të këtij universiteti, që kanë përfunduar Shkollën e Magjistraturës, apo janë ende në ndjekje të saj, prej nga dalin kuadrot më të larta të sistemit të drejtësisë, pushtetit të tretë në Shqipëri.

“Gjithë shoqëria ka nevojë për vetting”, vijoi më tej Xhepa, duke shtuar se kjo do të bëhet pikërisht prej anëtarëve të drejtësisë, ndaj shprehu kënaqësisnë që edhe ish-studentët e UET do të japin një shanc për të ardhmen.

“Jam këtu jo vetëm për t’iu përgëzuar, por edhe për t’iu garantuar gjithashtu që UET do të jetë një mbështetje për ju edhe në vazhdimësi. Rrugëtimi i njeriut me shkollën nuk mbyllet kurrë. Dëshiroj që ju të shikoni në UET një partner, një instrument për t’iu ndihmuar edhe juve në avancimin e mëtejshëm në karrierën profesionale, ashtu sikurse duam që t’iu kemi mentorët e brezit të ri, të atyrë që vazhdojnë studimet në universitet dhe atyre që do të jenë gjenerata e re e studentëve dhe do të marrin përsipër ato sfida që ju do t’i lini në mes. Ne i nisim betejat, por ato janë të pafundme”, u shpreh profesor Xhepa.

Gjatë fjalës së saj, Dekania e Fakultetit të Shkencave Juridike, Politike dhe Marrëdhënieve Ndërkombëtare në UET, Juelda Lamçe i quajti ish-studentët e shkuara dhe e ardhmja e UET. Ajo i ftoi gjyqtarët dhe prokurorët e ardhshëm të bëhen pjesë e UET në forma të ndryshme, si pedagogë, botues apo këshillues, në mënyrë që të përplotësohet mësimdhënia dhe të krijohen mundësi të reja për studentët e drejtësisë.

“Ju jeni zgjedhur në sistemin e drejtësisë jo vetëm për anën profesioanel, por edhe për figurën që përfaqësoni. Qëllimi i tryezës është që jo vetëm të shkëmbejmë eksperienca të përbashkëta, pasi karriera juaj dhe eksperienca e UET tashmë në vitin e 15-të, përpiqen që të takohen në një pikë të përbashkët. Ne ju duam në auditoret tona, ju duam si ekspertë të fushës, ju duam të jeni në bordet tona të tregut të punës, ju duam që të na jepni mendimet tuaja për mënyrën sesi mund të përmirësojmë kurrikulën. Ju tani i shikoni gjërat nga një këndvështrim tjetër dhe qasja juaj është shumë më objektive”, u shpreh Lamçe.

Pedagogu i UET, Andi Duraj u shpreh se ky takim me magjistratët vjen pak me vonesë dhe duhej të ishte realizuar më herët, por theksoi se takime të tilla do të kthehen në traditë dhe nivelet e bashkëpunimit do të thellohen më tej. Ai iu kujtoi ish-studentëve se dy libraritë online të UET janë shumë të pasura në lieteraturën e drejtësisë dhe mund të shfrytëzohen prej tyre në çdo kohë.

“Ju jeni shumë të rinj, por prapë e keni pjesën e eksperiencës. Magjistratura dhe shkolla të mëson sesnin e ligjshmërisë, por sensin e së drejtës nuk ta mëson ajo. UET ka shtëpinë botuese dhe secili prej magjistratëve mund kontribuuojë për të bërë një libër ku të jenë gjithë aktet proceduriale”, sugjeroi Duraj.

Duke qëndruar në këtë aspekt, Dekania Juelda Lamçe ftoi magjistratët të bëhen pjesë edhe të revistës “Justicia” me punime shkencore. “Punimet janë dy herë në vit, janar dhe qershor. I radhës do të jetë mbi procesin e decentralizimit të reformës territoriale”, theksoi ajo.

Ish- Pedagogu i UET, Dariel Sinaj, aktualisht Komisioner Publik u shpreh i bindur se ish-studentët do t’i mbajnë gjithmonë lidhjet me universitetin ku studiuan, pasi ai është një brand që do t’i shoqërojë gjithmonë. “Unë personalisht në UET u rrita. Ju keni qenë një brez, për të cilët ne kemi dhënë gjithçka. Ju përgëzoj pasi duhet shumë durim në punën tuaj”, nënvizoi Sinaj.

Magjistratët shprehën kënaqësinë që gjenden sërish në ambientet e UET dhe krenarë që kanë një emër të tillë në CV e tyre profesionale.

Tashmë me njohuri më të thella dhe me eksperienca të ndryshme në drejtësi, ata shprehën opinionet dhe sugjerimet e tyre mbi atë se çfarë mund të ndryshohet apo përmirësohet për të krijuar mundësi për studentët e rinj. Duke e cilësuar UET si një ndër universitetet më të mira, jo vetëm në sektorin privat por edhe publik, ata vlerësuan infrastrukturën, kapacitetet njerëzore, komunikimin dhe ndërveprimin me pedagogët, ndërsa kërkuan që të përmirësohet më tepër kurrikula në aspektin praktik dhe të vihet më shumë theksi në profile të caktuara.

Disa prej tyre u shprehën të gatshëm që me vullnet të plotë të ndihmojnë nëpërmjet dhënies së disa objeksioneve sesi mund të përmirësohet në teori dhe kuadrin e praktikës. Po ashtu, sugjeruan gjetjen e mundësive për realizimin e praktikave në institucionet e drejtësisë, në mënyrë që studentët të prekin anën praktike të profesionit dhe të jenë më të sigurtë kur të dalin në tregun e punës. Mes ndarjesh eksperiencash dhe sugjerimesh, ata kërkuan që në takimet e ardhshme bashkëpunimi të përvijohet me terma më konkretë.