Shkëmbim akademik dhe kulturor, UET mirëpret 24 studentë nga Hungaria

Në kuadër të forcimit të urave të ndërkombëtarizimit, Universiteti Europian i Tiranës priti në nisje të këtij semestri 24 studentë nga Universiteti i Obudas, institucioni i dytë më i madh dhe më i rëndësishëm në Hungari. Ata do të zhvillojnë një vizitë studimore njëjavore, ku do të njihen më nga afër me universitetin, pedagogët dhe studentët, programet e studimit, si dhe do të eksplorojnë qytetin dhe mundësitë që ai ofron në turizëm, kulturë, histori dhe gastronomi.

Në nisje të kësaj vizite, studentët u pritën në një takim nga presidenti i UET, Prof. Asoc. Dr. Selami Xhepa, dekania e Fakultetit të Ekonomisë, Biznesit dhe Zhvillimit, Dr. Elona Shehu, dhe Dekani i Studentëve, Dr. Kristi Bello. Duke kujtuar eksperiencën e tij si profesor vizitor dhe mbajtës i disa leksioneve për studentët ndërkombëtarë, profesor Xhepa tha se mbeti i impresionuar nga cilësia e edukimit që gjeti në këtë universitet.

Përveç bashkëpunimit të mëhershëm mes dy institucioneve arsimore, në kuadër të shkëmbimeve akademike dhe kërkimit shkencor, profesori u ndal te lidhja historike mes Shqipërisë dhe Hungarisë, si dy vende ish-komuniste. Ai përmendi gjithashtu rolin e Bullgarisë si kryeqendër për shumë organizata ndërkombëtare që diskutonin politika dhe reforma për ekonomitë në tranzicion në vitet ’90.

Duke folur për UET, një ndër universitetet më të mëdha private në Shqipëri, me numrin më të lartë të studentëve dhe programe të shumta, presidenti Xhepa ftoi studentët ta konsiderojnë si një opsion për zhvillimin e mëtejshëm të studimeve. Ai theksoi se UET ofron programe bachelor dhe master në gjuhën angleze, si dhe studime doktorale, ndërsa shumë shpejt pritet të zhvendoset brenda kampusit të ri.

“Këtë vit do të festojmë 20-vjetorin e funksionimit tonë, një organizatë e re por e përkushtuar ndaj standardeve më të larta. Mendoj se kemi dhënë një kontribut shumë serioz për të ruajtur standardet e arsimit në këtë vend dhe deri më tani e kemi përmbushur me sukses misionin tonë,” u shpreh profesor Xhepa, duke i ftuar  studentët të shohin Shqipërinë edhe si një destinacion turistik, ku vitet e fundit ka marrë një vëmendje të veçantë në këtë aspekt.

Në nisje të fjalës, dekania e Fakultetit të Ekonomisë, Biznesit dhe Zhvillimit, Dr. Elona Shehu, ndau eksperiencën personale si studente doktorature në Universitetin Obuda në vitin 2016, duke e quajtur një periudhë të jashtëzakonshme që e pasuroi me njohuri të thella dhe shkëmbime kulturore.

“Jam shumë e lumtur që ky cikël po rikthehet në Universitetin Europian të Tiranës. Dua që ky të jetë një bashkëpunim i vazhdueshëm, duke i ndihmuar studentët në kërkimin dhe idetë e tyre të projekteve, dhe duke i mirëpritur për shkëmbime studimore,” theksoi Shehu. Dekania prezantoi aktivitetin shkencor të UET, i zhvilluar përmes botimit të pesë revistave shkencore dhe organizimit të dy konferencave ndërkombëtare: DSSH – Ditët e Studimeve Shqiptare, një konferencë me akademikë dhe studiues nga vendet evropiane e më gjerë dhe DSSH Junior, e dedikuar për studentët.

Për lidershipin, si iniciativë dhe përgjegjësi, foli Presidentja e Këshillit Studentor, Megi Kanaçi, studente e vitit të tretë në Financë-Kontabilitet. Sipas saj, lidershipi studentor është thelbësor për ndërtimin e marrëdhënieve mes universiteteve, ku kontribuojnë organizatat studentore, shkëmbimet Erasmus dhe projektet e përbashkëta.

“Universiteti nuk është vetëm një vend ku fitojmë njohuri, por edhe një vend ku mësojmë të udhëheqim dhe të kuptojmë kush jemi. Marrëdhëniet dhe miqësitë që krijojmë sot mund të kthehen në projekte ndërkombëtare në të ardhmen,” u shpreh Kanaçi.

Duke falënderuar për pritjen e ngrohtë, koordinatorja e studentëve të Universitetit Obuda, Sara Lazanyi, ndau informacione të rëndësishme për institucionin ku ndjek studimet në nivel Master. Universiteti Obuda është një nga institucionet më të mëdha të arsimit të lartë në Hungari, me mbi 13,000 studentë në 7 fakultete në fushat e inxhinierisë, IT-së, shkencave natyrore, ekonomisë, bujqësisë dhe pedagogjisë. Po ahtu, ky universitet është pjesë e rankimeve globale, i renditur në kategorinë 601–800 të Times Higher Education 2026.