E-PHYSIO, platforma që po revolucionarizon edukimin e fizioterapistëve në Ballkanin Perëndimor

Është përmbyllur me sukses projekti E-Physio dedikuar modernizimit të edukimit të fizioterapistëve në Ballkanin Perëndimor. Në kuadër të tij, është mbajtur në Universitetin Europian të Tiranës konferenca finale me temë “Advancing Physiotherapy and Medical Sciences in the Digital Era”, me të pranishëm përfaqësues nga të gjitha institucionet partnere, stafi akademik, studentët dhe profesionistët e kujdesit shëndetësor nga i gjithë Ballkani Perëndimor.

Gjatë konferencës u paraqitën konkluzionet dhe arritjet e zbatimit dy vjeçar të projektit, u zhvilluan diskutime mbi të ardhmen e edukimit digjital të fizioterapisë dhe qëndrueshmërinë e rezultateve të projektit përtej periudhës së financimit. Eventi shërbeu edhe si një hapësirë ​​për të përforcuar partneritetet akademike dhe për të përshkruar drejtimet e ardhshme për kërkimin dhe inovacionin në fizioterapi dhe edukimin digjital të shëndetit.

E-Physio është një projekt i Erasmus+, financuar nga Bashkimi Europian, për ndërtimin e kapaciteteve në arsimin e lartë, i udhëhequr nga Universitatea de Medicina si Farmacie din Craiova (UMFCV), Rumani. Konsorciumi përbëhet nga 8 partnerë, 4 prej të cilëve janë IAL nga Ballkani Perëndimor dhe 4 të tjerë janë nga Rumania, Bullgaria dhe Turqia. Shqipëria u përfaqësua me dy universitete: Universiteti i Sporteve në Tiranë dhe Universiteti Europian i Tiranës. Prej disa vitesh, UET ka hapur Fakultetin e Shkencave të Aplikaura Mjekësore, duke ofruar tre programe bachelor dhe master në fushën e kujdesit mjekësor, si: Infermieri (shqip dhe anglisht), Imazheri/ Radioterapi dhe Fizioterapi.

Qëllimi kryesor i projektit E-Physio ka qenë përmirësimi i njohurive teorike, aftësive dhe kompetencave digjitale në lidhje me telerehabilitimin, për studentët dhe pedagogët e universiteteve pjesëmarrëse. Përmes tre fazave të zbatimit, projekti ka projekti ka iniciuar një kulturë të re shërbimi mjekësor, si dhe ka hapur rrugën për një brez të ri fizioterapistësh që zotërojnë kompetenca digjitale në ushtrimin e profesionit të tyre, që janë të lidhur globalisht dhe të përgatitur për t’u përballur me sfidat e peizazhit në zhvillim të kujdesit shëndetësor.

Arritjet kryesore të E-Physio

Projekti E-Physio ka arritur përparim të konsiderueshëm në modernizimin e edukimit të fizioterapisë në Ballkanin Perëndimor, duke vendosur standarde të reja për përdorimin e inovacionit, digjitalizimit dhe bashkëpunimin ndërkufitar. Përmes integrimit të teknologjive të përparuara dhe inovacionit pedagogjik, projekti ka lidhur me sukses të nxënit tradicional me nevojat e një mjedisi modern digjital të kujdesit shëndetësor.

Projekti prezantoi metodologji të reja arsimore, zhvilloi burime digjitale të të nxënit dhe trajnoi staf akademik për të ofruar mësimdhënie interaktive, duke shfrytëzuar me efektivitet mjetet teknologjike.

Në fazën e parë të zbatimit u ndërtua e-Physio, një mjedis gjithëpërfshirës online që ofron përmbajtje të dedikuar, bashkëpunim dhe vlerësim. Ai ndërlidh studentët, edukatorët dhe ekspertët klinikë përmes forumeve, mësimeve interaktive dhe seancave video live. I projektuar për të siguruar përfshirje, ndërveprim dhe qëndrueshmëri, ai u kthye në bazën e gjithë veprimtarisë së mëtejshme të projektit.

Gjatë fazës së dytë u lançua moduli i Telerehabilitimit – kursi i parë akademik i akredituar në Ballkanin Perëndimor, dedikuar fizioterapisë në distancë dhe rehabilitimit digjital. Ky modul trajnimi ofroi edhe Protokollet e Rehabilitimit Online, të cilët mbulojnë reumatologjinë, neurologjinë, ortopedinë dhe rehabilitimin kardiopulmonar.

Për të përmirësuar të nxënit me përvojë, konsorciumi krijoi gjithashtu një Klinikë Virtuale, ku studentët dhe profesionistët mund të shkëmbenin njohuri, të vëzhgonin raste klinike reale dhe të angazhoheshin në diskutime.

Faza e tretë dhe e fundit u përqendrua në pilotimin dhe testimin e materialeve të zhvilluara. Studentët fituan përvojë praktike në vlerësimin e pacientëve në distancë, planifikimin e trajtimit online dhe rehabilitimin digjital të bazuar në prova. Edukatorët përmirësuan kompetencat e tyre të mësimdhënies digjitale, duke aplikuar teknika të reja pedagogjike për të përmirësuar angazhimin dhe rezultatet e studentëve.

E-Physio është një revolucion fushën e fizioterapisë, pasi shërben si një komunitet novator që shfrytëzon zhvillimet teknologjike për ta bërë më të thjeshtë edukimin e profesionistëve të fushës, por nga ana tjetër për ta bërë më të lehtë, më të shpejtë dhe komod ofrimin e shërbimit shëndetësor për pacientët.