Bashkëpunimi UET- 3DSKAI sjell në auditor teknologjitë e avancuara të IA në printimin 3D

Jo më vetëm një ide abstrakte, por një model konkret. Tashmë, studentët e arkitekturës dhe inxhinierisë në Universitetin Europian të Tiranës do ta kenë më të lehtë të shprehin konceptet e tyre në projektimin e ndërtesave apo objekteve të ndryshme arkitekturore. Përmes përdorimit të programeve më të fundit të Inteligjencës Artificiale në teknologjinë e printimit 3D, dizajnet e tyre do të marrin formë dhe do të prezantohen më qartë e më kuptueshëm, duke finalizuar me sukses detyrat praktike, projektet apo punimet e diplomës.

Falë marrëveshjes së bashkëpunimit të Fakultetit të Inxhinierisë, Informatikës dhe Arkitekturës me 3DSKAI, kompania e parë e printimit 3D në Shqipëri, studentët do të përfitojnë mundësi të reja për të përmirësuar dhe zhvilluar më tej njohuritë dhe aftësitë e tyre në projektim dhe arkitekturë. Në workshop-in e parë që kjo kompani zhvilloi në auditorët e UET, studentët u njohën me programet më të fundit të Inteligjencës Artificiale që përdoren për të dimensionuar projektet dhe më pas për t’i kthyer ato, përmes printimit 3D, në modele konkrete dhe të prekshme.

Përfaqësuesi i kompanisë, Flavio Çyçi, përmes një tutoriali, u shpjegoi studentëve se si të ndërtojnë modele duke përdorur IA në mjetet më të thjeshta dhe konvencionale, duke u nisur nga skica dhe imazhe të krijuara prej tyre. “Me këto programe, ju mund të ndërtoni idetë tuaja nga një foto, t’i zhvilloni më tej dhe t’i modifikoni vazhdimisht, duke qenë produktivë në një kohë të shkurtër”, nënvizoi Çyçi.

Përmes përdorimit të softuerit Tripo AI, ai ilustroi krijimin e një modeli 3D, duke nisur nga importimi i një fotoje, gjenerimi automatik i modelit, rregullimi i detajuar strukturor dhe optimizimi i teksturës, deri te eksportimi përfundimtar.

Po ashtu, përmes modeleve të sjella, pajisjeve të printimit dhe robotëve, Çyçi demonstroi realizimin e gjithë procesit përmes programit Bambu Studio, i cili ofron teknologjitë më të avancuara në fushën e printimit 3D. Kompania 3DSKAI ka krijuar “fermën e saj të printimit”, siç e cilësoi ai, e cila përmban më shumë se 20 printer të dimensioneve të ndryshme, të aftë për të prodhuar modele në forma dhe madhësi të ndryshme. Ai i ftoi studentët që t’i dërgojnë pranë kompanisë idetë, projektet apo dizajnet e tyre dhe, brenda pak ditësh, t’i marrin ato të printuara në 3D.

Xhindi: Biznesi sjell në auditor tendencat e fundit të tregut të punës

Dëshmi të rëndësisë së bashkëpunimit mes akademisë dhe industrisë e cilësoi këtë workshop dekania e fakultetit, Prof. Asoc. Dr. Teuta Xhindi. Ajo theksoi se aktualisht janë rreth 40 marrëveshje bashkëpunimi me kompanitë kryesore në Shqipëri, në të gjitha profilet që mbulon Fakulteti i Inxhinierisë, Informatikës dhe Arkitekturës.

“Nëpërmjet këtyre bashkëpunimeve, ne përpiqemi të sjellim në auditorët tanë tendencat më të fundit të tregut të punës. Pavarësisht përpjekjeve të akademisë, janë pikërisht bizneset dhe kompanitë ato që na i përcjellin më shpejt zhvillimet dhe risitë e reja të tregut të punës”, u shpreh dekania, duke shpresuar që studentët jo vetëm të mësojnë nga këto workshop-e, por edhe të frymëzohen për të krijuar ide dhe projekte të reja, ndërkohë që IA u ofron lehtësi të mëdha në vizualizimin 3D.

Përgjegjësja e Departamentit të Arkitekturës dhe Inxhinierisë së Ndërtimit, Prof. Asoc. Dr. Otjela Lubonja, tha se ky nuk do të jetë workshop-i i fundit, pasi në vijimësi do të organizohen leksione të hapura dhe aktivitete të tjera në bashkëpunim me këtë kompani, për të sjellë në auditor përditësimet më të reja të fushës.

Përveç përdorimit të shërbimeve të kompanisë, si printimet 3D dhe maketet, Lubonja theksoi se studentët kanë mundësi të ndjekin praktika profesionale, internship-e, për të mësuar programe të reja dhe zhvilluar projektet që synojnë, dhe pse jo në të ardhmen të bëhen pjesë e saj.