Supremacia e vendimeve të GJEDNJ-së dhe Shqipëria

by, Anton Lulgjuraj, MSc

Abstract

Mbarimi i Luftës së Dytë Botërore, solli ndryshime rrënjësore në sferën e së drejtës. Evropa e gjendur në mes shkatërrimit absolut të shkaktuar nga lufta, gjeneroi rendin e ri juridik ku gurëthemeli potencoi mbrojtjen e të drejtave dhe lirive themelore të njeriut.
Ky është dimensioni i ri i të drejtës ndërkombëtare. Fillimi i gjysmës së dytë të shekullit të XX, krijoi instrumentet e para juridiko – ndërkombëtare për mbrojtjen e këtyre të drejtave.
Themelimi i organizatës panevropiane që quhet Këshilli i Evropës dhe organit të saj (Gjykatës Evropiane të të Drejtave të Njeriut), që sot kanë nën juridiksionin e saj mbi 820 milion banorë,
përbën organizatën më të sofistikuar ndërkombëtare për mbrojtjen e të drejtave të njeriut. Hartimi i KEDNJ – së përbën hapin e parë për të garantuar të drejtat bazike dhe liritë e njeriut.
Për të qenë anëtar i Këshillit të Evropës, domosdoshmërisht çdo shtet duhet së pari të aderojë në KEDNJ. Këtë gjë e ka bërë edhe Shqipëria, e cila ka aderuar në KEDNJ në vitin 1995.
Për këto dy dekada, Shqipëria është përballur me një numër të konsiderueshëm të vendimeve gjyqësore që kanë shkuar drejt rritjes së numri të çështjeve në GJEDNJ.