Kontrolli gjyqësor i veprimtarisë administrative dhe përparësitë e riorganizimit të sistemit gjyqësor në Republikën e Kosovës

by, Florent Muçaj, Hysni Bajrami

Abstract

Në të gjitha vendet me demokraci të zhvilluar, kontrolli i punës së administratës nga gjykatat është një parim i pranuar dhe i zbatueshëm në praktikat më të mira juridike evropiane dhe më gjerë. Zhvillimi i administratës publike dhe reformat në këtë sektorë kanë përherë si pikësynim afrimin e administratës publike më pranë qytetarit dhe ofrimin e shërbimeve të shpejta dhe kualitative. Por, e gjithë kjo veprimtari e gjerë dhe e rëndësishme që kryen administrata nuk mund të mbetet e pakontrolluar, sepse mungesa e kontrollit mund të sjellë shkelje dhe abuzim të të drejtave të qytetarit. Në këtë drejtim kontrolli gjyqësor llogaritet si mjeti më efektiv për të mbrojtur të drejtat individuale të qytetarëve nga shkeljet dhe abuzimet eventuale nga ana e administratës. Për më tepër kontrolli gjyqësor i administratës luan rol vendimtar për zhvillimin ekonomik të një vendi. Gjykatat efikase administrative rrisin gjithashtu transparencën e vendimeve administrative dhe mund të luajnë një rol të rëndësishëm në luftën kundër korrupsionit. Një gjyqësor i paanshëm dhe i pavarur është gurë-themeli i shtetit ligjor dhe i demokracisë së vërtetë.
Republika e Kosovës ka bërë hapa të rëndësishëm në këtë drejtim, miratimi i ligjit të ri për gjykatat dhe reformat që kanë ndodhur kohëve të fundit bazuar në këtë ligj janë hapat e dukshëm që janë marrë në drejtim të përmirësimit të performancës së gjyqësorit. Gjykimi i çështjeve administrative pritet të përmirësohet, meqë deri më tani ka pasur mjaft vërejtje ndaj Gjykatës Supreme lidhur me çështjet administrative për të cilat ajo ka vendosur, si instancë e shkallës së parë dhe të fundit. Krijimi i një departamenti të veçantë në kuadër të gjykatës Themelore në Prishtinë, pritet të sjellë më shumë efikasitet
dhe efektivitet në gjykimin e lëndëve administrative, njëheri, kjo do të ketë ndikim edhe në përmirësimin e punës së administratës, meqë tani, administrata duhet të vetëdijesohet se do të ketë kontroll të mirëfilltë të ligjshmërisë për aktet që ajo nxjerr