Integrimi i informacionit të Indeksit Global të Konkurrueshmerisë në një model statistikor graviteti për Shqipërinë - Economicus

by, Dorina Cumani

Abstrakt

Literatura dhe studimet e kohëve të fundit kanë zgjeruar fokusin e tyre në aspektin e faktorëve që ndikojnë në konkurrueshmërinë ekonomike të një vendi. Ato kanë nxjerrë në pah se konkurrueshmëria e vendeve nuk varet vetëm nga faktorët bazë të prodhimit, por edhe nga faktorë të tjerë shoqërorë; institucionet publike si: infrastrukturë, shëndetësi; faktorë eficence si: eficenca e tregut të mallrave, flukset tregtare apo e tregut të punës; arsimi i lartë ose trajnimi i specializuar; inovacioni. Qëllimi kryesor i këtij punimi është të analizojë flukset tregtare të ndërsjellta midis Shqipërisë dhe 35 vendeve të tjera duke u mbështetur në të dhënat e import-eksportit dhe në modelin e gravitetit. Pjesë klasike për modelin e gravitetit është studimi i ndikimit të madhësisë së ekonomisë së vendit dhe asaj të huaj, distanca midis vendeve të veçanta. Një e veçantë e këtij punimi është studimi i ndikimit të konkurrueshmërisë (GCI-global competitivness index) në flukset tregtare të Shqipërisë dhe gjithashtu sa ndikojnë faktorët e mësipërm të vendeve partnere në flukset tregtare të Shqipërisë. Punimi synon t’i japë përgjigje pyetjes se çfarë informacioni na përcjell Indeksi Global i Konkurrueshmërisë përsa i përket performancës së Shqipërisë në tregtinë e jashtme.