{"id":6499,"date":"2020-10-31T08:54:18","date_gmt":"2020-10-31T08:54:18","guid":{"rendered":"https:\/\/uet.edu.al\/?p=6499"},"modified":"2020-10-31T08:54:18","modified_gmt":"2020-10-31T08:54:18","slug":"me-te-miret-e-kerkimit-shkencor-ne-uet-marrin-cmimin-e-presidentit","status":"publish","type":"post","link":"https:\/\/uet.edu.al\/en\/me-te-miret-e-kerkimit-shkencor-ne-uet-marrin-cmimin-e-presidentit\/","title":{"rendered":"M\u00eb t\u00eb mir\u00ebt e k\u00ebrkimit shkencor n\u00eb UET marrin \u00c7mimin e Presidentit"},"content":{"rendered":"

N\u00eb kuad\u00ebr t\u00eb Dit\u00ebve t\u00eb Studimeve Shqiptare, Universiteti Europian i Tiran\u00ebs mbajti p\u00ebr t\u00eb dyt\u00ebn her\u00eb radhazi konferenc\u00ebn \u201cInterdisciplinary Junior Researcher\u201d ku m\u00eb t\u00eb mir\u00ebt mor\u00ebn nj\u00eb \u201cpasaport\u00eb\u201d n\u00eb xhep drejt s\u00eb ardhmes.<\/em><\/p>\n

B\u00ebhet fjal\u00eb p\u00ebr punime shkencore t\u00eb fushave t\u00eb ndryshme si ajo humane, sociale, ekonomike, sh\u00ebndet\u00ebsore, teknologjike etj., t\u00eb cilat vijn\u00eb n\u00eb kuad\u00ebr t\u00eb pes\u00eb fakulteteve t\u00eb Universitetit Europian t\u00eb Tiran\u00ebs dhe q\u00eb u vler\u00ebsuan me \u00c7mimin e Presidentit.<\/p>\n

<\/div>\n

Gjat\u00eb fjal\u00ebs hap\u00ebse t\u00eb konferenc\u00ebs, Z\u00ebvend\u00ebsrektorja p\u00ebr K\u00ebrkimin Shkencor n\u00eb UET, Prof. Dr. Drita Kruja tregoi jo vet\u00ebm pun\u00ebn e palodhur t\u00eb sudent\u00ebve, por edhe avantazhet q\u00eb krijon k\u00ebrkimi shkencor p\u00ebr t\u00eb ardhmen e tyre.<\/p>\n

\u201cUniversiteti Europian i Tiran\u00ebs si nj\u00eb nd\u00ebr liderat e sistemit universitar shqiptar punon p\u00ebr t\u00ebrheqjen n\u00eb k\u00ebrkimin shkencor t\u00eb k\u00ebrkuesve t\u00eb rinj p\u00ebrmes krijimit t\u00eb nj\u00eb mjedisi stimulus. Programet tona p\u00ebrgatisin student\u00eb q\u00eb jan\u00eb t\u00eb aft\u00eb t\u00eb nd\u00ebrmarrin jo vet\u00ebm k\u00ebrkim baz\u00eb, por dhe t\u00eb aplikuar, nj\u00eb fush\u00eb q\u00eb \u00e7do dit\u00eb e m\u00eb shum\u00eb po k\u00ebrkohet nga tregu i pun\u00ebs\u201d,<\/em>\u00a0u shpreh Kruja.<\/p>\n

Ashtu si n\u00eb UET, konferencat \u201cInterdisciplinary Junior Researcher\u201d mbahen edhe n\u00eb disa nga universitetet m\u00eb prestigjoze t\u00eb bot\u00ebs, ku student\u00ebt jan\u00eb t\u00eb lir\u00eb t\u00eb zgjedhin nj\u00eb tem\u00eb k\u00ebrkimore mbi t\u00eb cil\u00ebn ata punojn\u00eb dhe m\u00eb pas prezantojn\u00eb para panelit gjykues.<\/p>\n

Edicioni i dyt\u00eb i konferenc\u00ebs i mbajtur m\u00eb 15 tetor rezultoi nj\u00eb sukses, fal\u00eb stafit akademik, por edhe merit\u00ebs s\u00eb madhe t\u00eb student\u00ebve t\u00eb cil\u00ebt soll\u00ebn studime t\u00eb punuar me kujdesin m\u00eb t\u00eb madh duke t\u00ebrhequr duksh\u00ebm v\u00ebmendjen e juris\u00eb.<\/p>\n

\u201cNuk kam asnj\u00eb dyshim se kjo ishte nj\u00eb p\u00ebrvoj\u00eb interesante\u00a0 p\u00ebr t\u00eb gjith\u00eb pjes\u00ebmarr\u00ebsit dhe un\u00eb shpresoj se n\u00eb vitet ne vazhdim ky forum do t\u00eb rritet duke u b\u00ebr\u00eb nj\u00eb forum shk\u00ebmbimi idesh dhe p\u00ebrvojash rajonale, dhe pse jo nd\u00ebrkomb\u00ebtare\u201d,<\/em>\u00a0u shpreh Z\u00ebvend\u00ebsrektorja p\u00ebr K\u00ebrkimin Shkencor.<\/p>\n

Prezantimet e student\u00ebve u gjykuan nga paneli q\u00eb p\u00ebrb\u00ebhej nga 7 an\u00ebtar\u00eb, ku n\u00eb fund u zgjodh nga nj\u00eb tem\u00eb fituese p\u00ebr \u00e7do fakultet, nd\u00ebrsa \u00e7mimet u akorduan nga Presidenti i Universitetit Europian t\u00eb Tiran\u00ebs, Selami Xhepa, duke ndihmuar n\u00eb krijimin e nj\u00eb mjedisi sa m\u00eb stimulues p\u00ebr t\u00eb gjith\u00eb k\u00ebrkuesit e rinj.<\/p>\n

\"\"<\/p>\n

N\u00eb k\u00ebt\u00eb edicion pati prezantime nga student\u00eb pjes\u00eb t\u00eb projekteve nd\u00ebrkomb\u00ebtare, konkretisht t\u00eb projektit \u201cSMART al\u201d, i cili u p\u00ebrfaq\u00ebsua nga koordinatori i projektit, Fatmir Guri.<\/p>\n

Nj\u00eb nd\u00ebr objektivat kryesore t\u00eb k\u00ebtij projekti ishte p\u00ebrmir\u00ebsimi i njohurive teorike dhe praktike t\u00eb student\u00ebve master n\u00eb administrimin e territorit, politikave bujq\u00ebsore, zhvillimit rural dhe inovacionin, si dhe aft\u00ebsive t\u00eb tyre n\u00eb pjes\u00ebmarrjen n\u00eb proceset vendimarr\u00ebse. \u00a0Ky u konkretizua m\u00eb s\u00eb miri me rastin studimor t\u00eb prezantuar: \u201cRoli i kapitalit shoq\u00ebror n\u00eb nd\u00ebrtimin e treguesve t\u00eb origjin\u00ebs n\u00eb Shqip\u00ebri\u201d.<\/p>\n

Nj\u00eb tjet\u00ebr kategori student\u00ebsh q\u00eb mor\u00ebn pjes\u00eb ishin student\u00ebt q\u00eb kan\u00eb punuar dhe prezantuar tem\u00ebn n\u00eb kuad\u00ebr t\u00eb programit \u201cErasmus+\u201d n\u00eb disa nga universitetet prestigjoze me t\u00eb cilat UET ka marr\u00ebveshje nd\u00ebrkomb\u00ebtare. Nd\u00ebrkomb\u00ebtarizmi i UET ka mund\u00ebsuar q\u00eb student\u00ebt t\u00eb cil\u00ebt kan\u00eb qen\u00eb pjes\u00eb aktive t\u00eb k\u00ebtij procesi t\u00eb shk\u00ebmbejn\u00eb njohurit\u00eb e tyre dhe t\u00eb sjellin nj\u00eb cop\u00ebz nga eksperienca e tyre.<\/p>\n

Nj\u00eb pik\u00eb shum\u00eb e r\u00ebnd\u00ebsishme ishte dhe projekti 500+ i cili mb\u00ebshtet bashk\u00ebpunimin me industrin\u00eb p\u00ebr t\u00eb realizuar k\u00ebrkime t\u00eb aplikuara. Ky program \u00ebsht\u00eb nj\u00eb vazhdim i iniciativ\u00ebs s\u00eb UET p\u00ebr t\u00eb qen\u00eb i shnd\u00ebrruar n\u00eb universitet i biznesit.\u00a0 Projekti n\u00eb fjal\u00eb p\u00ebrfshin 500 kompanit\u00eb m\u00eb t\u00eb m\u00ebdha n\u00eb vend sipas klasifikimit zyrtar dhe \u00ebsht\u00eb nj\u00eb projekt i gjer\u00eb bashk\u00ebpunimi 5 vje\u00e7ar n\u00eb aspekte t\u00eb ndryshme. Programi 500+\u00a0\u00ebsht\u00eb materializim i nj\u00eb tendence bashk\u00ebkohore q\u00eb e lidh gjithnj\u00eb e m\u00eb ngusht\u00eb universitetin me tregun e pun\u00ebs dhe me biznesin si nj\u00eb nga funksionet themelore t\u00eb universitetit n\u00eb shoq\u00ebrit\u00eb e sotme, aq m\u00eb tep\u00ebr t\u00eb universiteteve private.<\/p>\n

Student\u00ebt fitues t\u00eb\u00a0<\/strong>\u201cInterdisciplinary Junior Researcher\u201d\u00a0<\/em><\/strong>n\u00eb UET<\/strong><\/p>\n

Nj\u00eb kontribut t\u00eb madh dhan\u00eb student\u00ebt m\u00eb t\u00eb shk\u00eblqyer t\u00eb masterit si, Juna Beqiri, Klara Rrugea, Dea Nini, Bojken Sinaj, Sadjola Xhelili, Gerald Tukseferi dhe Theodhor Xhillari, temat e t\u00eb cil\u00ebve u vler\u00ebsuan shum\u00eb sidomos nga ana praktike.<\/p>\n

Student\u00ebt pat\u00ebn mund\u00ebsin\u00eb t\u00eb vinin n\u00eb praktik\u00eb njohurit\u00eb teorike q\u00eb kan\u00eb marr\u00eb gjat\u00eb viteve t\u00eb studimit n\u00eb UET, si dhe t\u00eb m\u00ebsonin nga eksperiencat e nj\u00ebri-tjetrit n\u00eb m\u00ebnyr\u00eb q\u00eb n\u00eb nj\u00eb t\u00eb ardhme t\u00eb af\u00ebrt t\u00eb perfeksionin akoma dhe m\u00eb tej temat e tyre aktuale.<\/p>\n

Sadiola Xhelili: UET-i \u00ebsht\u00eb universiteti i mund\u00ebsive<\/strong><\/p>\n

Sadjola Xhelili, studentet e Shkencave t\u00eb Komunikimit me profil n\u00eb Marr\u00ebdhenie Publike Politike tregon jo vet\u00ebm emocionet si fituese, por edhe rrug\u00ebtimin e saj n\u00eb UET.<\/p>\n

\u201cReferimi bazohej n\u00eb nj\u00eb ekzaminim t\u00eb krizave t\u00eb komunikimit t\u00eb Kryeministrit Rama me fokus n\u00eb reagimet e tij n\u00eb platform\u00ebn Twitter mbi rastin e t\u00ebrmetit t\u00eb 26 n\u00ebntorit dhe pandemis\u00eb COVID-19. Meq\u00ebn\u00ebse tema ishte paksa pikante, k\u00ebt\u00eb het\u00eb ekperimentova me tonin e z\u00ebrit. Zgjodha t\u00eb jem e qet\u00eb dhe e shtruar n\u00eb t\u00eb folur. Duke marr\u00eb shkas nga tema e cila n\u00eb q\u00ebnd\u00ebr kishte nj\u00eb figur\u00eb politike, u p\u00ebrpoqa t\u00eb mos krijoj\u00eb iluzione dhe t\u00eb mos ngacmoj bindjet e audiences\u201d,<\/em>\u00a0rr\u00ebfen themeluesja e agjensis\u00eb s\u00eb PR-it Busphere, e cila thekson se p\u00ebr t\u00eb UET ka nj\u00eb merit\u00eb t\u00eb pashlyeshme, pasi e ka orientuar dhe adresuar drejt asaj q\u00eb do.<\/p>\n

Nd\u00ebrsa marrjen e \u00c7mimit t\u00eb Presidentit ajo thot\u00eb se do ta kujtoj\u00eb si nj\u00eb nga momentet m\u00eb speciale dhe se ndihet e privilegjuar. P\u00ebr t\u00eb UET-i \u00ebsht\u00eb universiteti i mund\u00ebsive.<\/p>\n

Juna Beqiri: Ja si mund t\u2019u sh\u00ebrbej\u00eb punimi im shkencor bizneseve<\/strong><\/p>\n

Fakultetin e Ekonomikut e p\u00ebrfaq\u00ebsuan dy studentet Juna Beqiri dhe Klara Rrugea. T\u00eb dyja me master profesional n\u00eb Menaxhim Biznesi zgjodh\u00ebn t\u00eb p\u00ebrfaq\u00ebsoheshin me nj\u00eb tem\u00eb mjaft interesante: \u201cQarkullimi (turnover-i) i punonj\u00ebsve n\u00eb industrin\u00eb hoteliere\u201d.<\/p>\n

\u201cGjat\u00eb hulumtimeve t\u00eb kryera mbi universitetet n\u00eb Tiran\u00eb q\u00eb ofrojne k\u00ebto programe studimi, konstatova q\u00eb UET ishte universiteti i cili plot\u00ebsonte m\u00eb mir\u00eb nevojat e mia p\u00ebr sa i p\u00ebrket llojit t\u00eb programeve, nivelit dhe formimit t\u00eb pegagogeve, si dhe orareve shum\u00eb t\u00eb p\u00ebrshtatshme p\u00ebr student\u00eb si un\u00eb, t\u00eb cil\u00ebt jan\u00eb n\u00eb marr\u00ebdhenie pune. P\u00ebr k\u00ebto arsye vendosa t\u00eb kryej nj\u00eb Master Profesional 1 vjecar, n\u00eb Menaxhim Biznesi, me profil Menaxhimin e Burimeve Njer\u00ebzore\u201d,<\/em>\u00a0tregon Juna Beqiri, aktualisht menaxhere e Burimeve Njer\u00ebzore n\u00eb nj\u00eb hotel me pes\u00eb yje n\u00eb Tiran\u00eb.<\/p>\n

\"\"<\/p>\n

Ajo tregon se si bizneset mund t\u00eb cilat operojn\u00eb n\u00eb industrin\u00eb e mik\u00ebpritjes mund t\u00eb p\u00ebrfitojn\u00eb nga gjetjet e studimit t\u00eb saj dhe koleges Klara Rrugea.<\/p>\n

\u201cPse jo edhe biznese t\u00eb tjera t\u00eb cil\u00ebt operojn\u00eb n\u00eb industrin\u00eb e mikpritjes mund t\u00eb p\u00ebrfitojne nga gjetjet e k\u00ebtij studimi me q\u00ebllim hartimin e politikave dhe programeve specifike lidhur me paketat e kompensimit t\u00eb punonj\u00ebsve,\u00a0 me p\u00ebrmir\u00ebsimin e mjedisit t\u00eb pun\u00ebs apo me rritjen e k\u00ebnaq\u00ebsis\u00eb n\u00eb pun\u00eb, me synim uljen e qarkullimit (turnover-it) t\u00eb stafit t\u00eb tyre\u201d,<\/em>\u00a0u shpreh Juna, nd\u00ebrsa nuk e fshehu emocionin q\u00eb i dha marrja e \u00c7mimit t\u00eb Presidentit.<\/p>\n